Categories
Alm. íþrótta Fréttir

Nýr þjálfari hjá Hlaupahópi

Kæru Stjörnur – nú liggja fyrir breytingar hvað snertir þjálfaramál hjá okkur í Hlaupahóp Stjörnunnar. Nýr yfirþjálfari Arnar Pétursson tekur við keflinu í dag 18.október.

Siggi P. hefur verið þjálfari Hlaupahóps Stjörnunnar frá stofnun hans haustið 2012.

Fyrstu árin sá hann einn um alla þjálfun en hefur síðan minnkað við sig seinni árin og aðrir komið að þjálfuninni. Haustið 2020 tók hann að sér þjálfun meistaraflokks FH í millivegalengda- og langhlaupum og óskaði eftir því að draga sig út úr þjálfun hjá Stjörnunni. Af því varð ekki þá en nú er sú stund runnin upp. Við þessi tímamót vill Hlauparáð Stjörnunnar þakka Sigga P. fyrir hans mikla starf í þágu hlaupahópsins og öll árin. Hann hefur ávallt verið tilbúinn til að gefa góð ráð, hvort sem um er að ræða æfingar, undirbúning fyrir keppni, framkvæmd Stjörnuhlaupsins eða veitingu viðurkenninga á árshátíð hlaupahópsins. Dæmi um þetta er vel heppnað hlaupanámskeið núna á haustdögum.

Eftir fordæmalausan faraldur og töluverðar skerðingar á okkar daglega hlaupalífi horfir nú allt til betri vegar. Áður aflýstum hlaupum og aðrir viðburðir eiga nú von um að komast aftur á dagatalið og verða að veruleika.

Við erum nú þegar með hlaupanefnd að störfum sem leggur á ráðin með utanlandsferð nk haust. Einnig verður haldið Stjörnuhlaup á vordögum og í sumar förum við í utanvega-hlaupaferð.

Hvað snertir vetrarstarfið og næstu æfingar þá hefur Hlauparáðið ákveðið að ráða Arnar Pétursson sem aðalþjálfara hópsins. Hann mun halda utanum og skipuleggja allar æfingar hópsins og verður með okkur á æfingum á mánudögum, miðvikudögum og fimmtudögum.  Inniæfingar í FH-Höllinni byrja svo 28. október.

 Halldóra Gyða Proppé verður áfram með okkur og mun koma að æfingum með svipuðu sniði og áður. Hún mun einna helst hafa umsjón með hlaupahóp 1 og koma að tveimur æfingum í viku. Þessum fréttum fylgja eðlilega einhverjar breytingar og mun Arnar kynna sínar áherslur á mánudagsæfingum þannig að við hittumst í Ásgarði eftir æfingu og þar fer samtalið fram.

Áfram verðum við með síðu á fb „Virkar Stjörnur“ til að upplýsa félaga og halda utanum okkar dagskrá. Ekki hika við að koma sem gestur á æfingu og sjá með eigin augum hvað Hlaupahópur Stjörnunnar hefur fram að færa.

Æfingar frá Ásgarði kl 17:30 á  mánudögum og miðvikudögum. Frá Ásgarði kl 09:30 á laugardögum. Í FH- Höllinni verða inniæfingar kl 19:30 á fimmtudögum.

Upptakturinn í okkar starfi í vetur verður uppbygging og grunnur að því að ná árangri næsta sumar. Ná fram sínu besta í hlaupahátíðinni sem Reykjavíkur maraþonið er og líka hitt að gera gott mót í næstu utanlandsferð hópsins næsta haust.

Munum að skrá okkur í hópinn og greiða árgjaldið á sportabler.com,  leggja þannig grunn að góðu og farsælu starfi áfram. – Hlaupakveðja, Hlauparáð.